Zamboanga: Victima de kema na Tawi-Tawi ya recivi ayuda financial

0
6

El mga familiares quien afectao na kema o incendio na Barangay Poblacion, municipio del Bongao, provincia del Tawi-Tawi, ay puede ya reconstruji de ila casa por medio del ayuda financial ya dale canila el govierno del region autonomo y del provincia.

El Ministerio del Servicios Sociales y Desarollo na Bangsamoro Autonomous Region in Muslim Mindanao (MSSD-BARMM) ya anuncia del Lunes cay 371 del mga afectao familias ya recivi P23,000 ayuda financial cada uno desde’l MSSD pormedio del programa de “Emergency Shelter Assistance (ESA)”.

El ESA es un programa de proteccion social del MSSD bajo el “Disaster Response and Management Division (DRMD)” que ta concentra na rehabilitacion y reconstruccion del casa del mga pobre familias afectao na calamidad natural man o hinde.

Ya recivi tamen P29,000 ayuda financial desde’l govierno provincial del Tawi-Tawi el cada uno del 371 mga afectao familia.

Base na evaluacion del MSSD, un mil familia el ya afecta na incendio.

Mayoriya de ila ta esta na Salamat Elementary School and Tawi-Tawi School of Fisheries, mientras el losdemas na de ila parientes.

Demas temprano, el MSSD ya distribuji ayuda con mga afectao familias como aros, y comida en latao. Ya dale tamen ayuda financial de P2,000 con mga vicima de incendio. (B. Garcia, photo courtesy of MSSD-BARMM)

Leave a Reply