Admitido na hospital el un trabajante de construccion despues que ya lancia con ele el un persona na Barangay Tetuan en este ciudad, asegun con el pulisiya local del Lunes.
Asegun con el Zamboanga City Police Station 6 (ZCPS6) el incidente ya ocuri mga alas 7:45 del Domingo aga na interseccion del Sta. Cruz, Barangay Tetuan, en este ciudad.
El ZCPS6 ya nombra con el victima como si Danilo Peña, 30 años el edad, y residente del Calle Don Toribio, Barangay Tetuan.
Base na investigacion, ya anda si Peña na Sta. Cruz para abre con el barbula del de ila gripo de agua cuando ya abuya el suspechao, si Jomar Daplas, y ya lancia con el victima por dos veces.
Si Peña, quien ya sufri irida na pecho y detras, ya istindi para na un sercano privado hospital mientras el suspechao ya escapa para na Barangay Guiwan.
Asegun con el pulisiya, rabiao si Daplas con Peña, quien un informante del ZCPS6, cay ya reporta el victima na autoridad cay un “drug pusher” el suspechao.
El pulisiya ta ase enbuscada con Daplas para aresta con el suspechao quien ta esconde este mga tiempo. (B. Garcia, photo courtesy of ZCPS 6)
