Serca 2,000 residentes el ya afecta na avenida el Domingo por causa del fuerte aguacero ya causa el mal tiempo na ciudad de Zamboanga.
Asegun con el City Disaster Risk Reduction and Management Office (CDRRMO) aquellos quien afectao amo mga residentes de cuatro barrio como el siguientes: Tugbunga; Sta. Maria; Guiwan; y el Tumaga.
Asegun con el CDRRMO, el mga afectao residentes ya evacua para na “covered court”, barrio hall, mosque, “multi-purpose hall”, y na casa del de ila parientes.
Mientras tanto, mga personajes del CDRRMO y del “search and rescue unit” del bombero, ya salva con 23 personas quien ya keda bacul na rio de Canucutan, Barangay Pasonanca.
Tiene tamen cuantos lugar y barangays el ya afecta na avenida pero nohay mas evacua mga residentes. Este ta incluwi el Barangay Tetuan, Manicahan, Curuan, Vitali, Sibulao y Pasonanca.
El Alcalde John Dalipe ya diriji con el Oficina de Desarrollo y Bienestar Social del Ciudad (City Social Welfare and Development Office) para dale ayuda con mga afectao familias en colaboracion con mga Barangay Disaster Risk Reduction and Management Councils.
El PAG-ASA ya anuncia cay ya experiencia el ciudad de Zamboanga mal tiempo del Domingo por causa del Intertropical Convergence Zone (ITCZ). (B. Garcia, photo courtesy of CDRRMO)