Un persona ya muri na un incidente de ensendio enantes maga alas cuatro cuarenta’y sinco del aga na Islamic Drive, Barangay Sta. Barbara, este ciudad.
Asegun con Superintendent Lucio Albaracin, el hefe del bombero de este ciudad, con el victima ya conose como si Hadji Kidang Haber, cuarenta años el edad.
Asegun con Albaracin cay el fuego ya principia na un vacante cuarto na segundo piso del casa de Taraja Haber y derepente ya man calayat.
Asegun con Albaracin cay nohay mas puede sale si Haber cuando ya man timpak el segundo piso durante el kema despues que ya bira otraves adentro del casa el victima para saka maga cosas valuable.
Con el resto de Haber ya recubri maga alas sinco cuarenta’y sinco del aga despues que ya apaga ya el fuego.
Nohay pa habla el bombero si cuanto el cantidad del destroso na ensendio. (Bong Garcia, Jr.) (Photo Courtesy of Ely Dumaboc)