Maga operativas de Criminal Investigation and Detection Group-9 (CIDG-9) ya aresta con un mujer durante del campanya contra wanted persona aqui na ciudad de Zamboanga.
Asegun con Coronel John Francis Encinareal, hefe del CIDG-9, con el arestao persona ya conose como si Almalyn Kasim, treynta’y siete años el edad y residente del Wingo Subdivision, Barangay San Roque, este ciudad.
Asegun con Encinareal cay con Kasim ya aresta del Sabado tarde na un shopping mall na calle Governador Camins, Barangay Camino Nuevo, este ciudad.
Si Encinareal ya habla cay si Kasim tiene pendiente oren de aresto por el crimen de robo y con el piansa de sien mil pesos estaba na tribunal del ciudad de Zamboanga.
El asunto contra con Kasim ya planta el duenio del Winzell Hotel cay alegaomente ya man extort canila veinte mil pesos el suspechao.
Sin embargo, el tribunal ya ase sale el orden de aresto cay si Kasim ya falya atende con maga vista del su asunto.
Con Kasim ya lleba na oficina del CIDG-9 para el propio documentacion. (Bong Garcia, Jr.)
(Photo Courtesy of CIDG IX)
