Muerto el un retirao pulis y tata del un doctor quien acusao na matansa del antes alcalde del ciudad de Lamitan na un incidente de tiro enantes aga na mencionao ciudad.
El Coronel Pedro Martirez, Basilan police director, ya nombra con el victima como si Rolando Yumol, sesenta’y nueve anios el edad y residente del Calle Rizal na Barangay Maganda ciudad de Lamitan.
Asegun con Martirez cay base na investigasion, con Yumol ya tira apuera na su casa maga alas seis sincuanta’y sinco enantes aga el dos desconosido personas muntao na un motor.
Con Yumol, quien ya sufri mucho irida de bala na su cuerpo, ya lleba corre para na hospital pero ya declara conele muerto el doctor cuando ya llega na facilidad medical.
Maga pulis ya recubri tres capsula de calibre cuarenta’y sinco pistola na lugar del crimen y ya recubri tamen un caurenta’y sinco pistola na posesion del victima.
Si Yumol amo el tata de Doctor Chao-Tiao Yumol, quien acusao na matansa del antes alcalde del ciudad de Lamitan Rosita Furigay, su ayudanta ejecutivo Victor Capistrano y Jeneven Bandiala, un guardia del Universidad del Ateneo de Manila.
Con Furigay, Capistrano y Bandiala alegaomente ya tira si Doctor Yumol del domingo tarde adentro de Universidad de Ateneo de Manila.
El anak de Furigay, si Hanna ya iri durante el incidente y admitido ahora na hospital na Manila.
Con el maga victima ya tira si Doctor Yumol cuantos minutos antes el graduacion de Hanna na studio de abogsiya na mencionao unibersidad.
Con Doctor Yumol ya puede aresta maga pulis y detenido ahora. (Bong Garcia)