Pasada alas jes del noche de martes petsa veinte seis de Hulyo año dos mil veinte dos, un concierne persona na nombre de Nursima Sali y Lao, veinte sinco años el edad, muber kasaw y residente de Purok 3C Barangay Sta. Catalina llevando con Benhar Mahalail y Sakkam el ya llega na estacion de polisiya seis por el reklamo de Act of Lasciviousness.
Base na report del estasyon, alas dos del tarde del martes, el suspechao ya llama na telepono y ya man book un home service massage con el biktima para alas cuatro del tarde del semehante dia.
El biktima ya anda na skwela de Sta. Barbara para man mirahan pati el kliyente quien asegun el suspechao, na ora que ya man book y ya anda na kasa del suspechao na Phase 2, Asinan, Barangay Kasanyangan en este ciudad para hace el body scrub y Ventosa Massage.
Cuando asegun ya acaba ya el masahe, el suspechao ya hala con el cabesa del biktima y ya tapa de este boka usando su palma’y mano.
El biktima ya pwede escapa na mano del suspechao y hunto sila ya sale apwera na kasa, cuando ya pidi ya el biktima con el pago, nuay asegun paga el suspechao y ya kore para na direksyon de Sitio Bugguk, Kasanyangan.
El suspechao ya pwede sangga el maga concierne vivientes y ya lleva na maga oficiales del Barangay Kasanyangan.
El suspechao ta esta ya awra baho na kustodiya del ZCPS6. (April Boy Regino)