Un facilitadora financiera (financial facilitator) del grupo Abu Sayyaf el ya aresta mga autoridad na un operacion de aplicacion de ley na provincia de Basilan, el policia local ya anuncia del Lunes.
Si Coronel Alexander Lorenzo, el director del Zamboanga City Police Office, ya habla cay con el arestao suspechao ya conose como si Norkisa Omar Asnalul alias Norkisa Omar Ibno, 32 años el edad.
Asegun con Lorenzo, con Asnalul ya aresta na un operacion de aplicacion de ley por medio de sirvir orden de aresto mga alas 10:52 del Sabado denoche na Sitio Bliss, Barangay Lanote, ciudad de Isabela, el cabesera de provincia de Basilan.
Si Lorenzo ya habla, si Asnalul tiene el pendiente orden de aresto por violacion del ley de republica numero 10168 o mas conosido como el “The Anti-Terrorism Financing Prevention and Suppression Act of 2012” y el ley de republica numero 11479 o mas conosido como el “The Anti-Terrorism Financing Prevention and Suppression Act of 2020” sin recomendao piansa que ya dale el un tribunal local del Deciembre 20, 2023.
Base na registro del policia, ya man hunta si Asnalul canda Myrna Mabanza, listao como un asociado del grupo Al-Qaeda y con Ajida Nasalun na ciudad de Isabela para entrega el dinero y algunas disposiciones que ya imbia el grupo del Al-Qaeda para con el grupo Abu Sayyaf para continua de ila actividades de terorismo.
Si Asnalul amo el esposa del defunto Ramji Ajiju, anak del defunto Abdullah Ajijul, un experto na hacida de bomba.
Listao si Asnalul como el de todo “wanted” persona del Criminal Investigation and Detection Group. (B. Garcia)