Ya muri el un consejal na un incidente de tiroteo na uno del mga municipios na Zamboanga del Norte, asegun con el policia del Viernes.
El policia ya identifica con el fatalidad como si Consejal Glecerio Redillas del municipio del Piñan, Zamboanga del Norte.
Asegun con el policia, el incidente ya ocuri pasada alas siete del Jueves denoche na Barangay Poblacion, Piñan.
Base na investigacion del policia, si Redillas sintao na balconaje del su casa cuando ya llega el un desconocido persona quien ya tira con el oficial sin provicacion.
Asegun con el policia, con Redillas ya tupa dos tiro na cabesa que ya causa su ensueguidas muerte.
El suspechao enseguidas ya escapa despues del incidente.
El policia ta continua el investigacion para determina el motivo y el suspechao del incidente.
Si Redillas un reeleccionista candidato para May 12, 2025 eleccion. (B. Garcia)