El gobierno local, por medio del Oficina de Medio Ambiente y Recursos Naturales del Ciudad, o OCENR, ta esperansa el llegada del 45 nuevo trak de basura para mobiliza mas y mejora el manejo de basura na ciudad.
Este ya vene despues que el Alcalde John Dalipe ya aprova el compre del mga nuevo trak de basura na 2024 y 2025.
Si Gerry Pollisco, el subjefe del OCENR, ya habla el 10 trak esperansao llega este año de 2024; 20 trak hay compra usando el fondo bajo el presupuesto suplementario numero tres de 2024; y 15 trak hay compra con alocacion bajo el presupuesto ejecutivo de 2025.
Si Pollisco ya rendi gracias con Dalipe por el significante suporta na todo esfuerzos del OCENR para hace viable solucion na disposicion de basura del ciudad de Zamboanga.
Si Pollisco ya motiva con el diferente comunidades para mejora de ila mecanismo na coleccion de basura, segregacion de basura, reciclaje y otros practica de adaptacion na cambio de clima como propio manejo de basura y proteccion del medio ambiente es obligacion de todos.
Mientrastanto, el Zamboanga City Solid Waste Management Board ya descuti na reciente hunta el implementacion del 10-año plano de manejo de basura del ciudad.
Si Dalipe ya apela con el mga miembros del junta para continua de ila dedicacion para limpio, verde y mas sostenable ciudad de Zamboanga. (B. Garcia)