Un sospechoso rubao motorciclo, el ya puede recubri despues el maga oficiales del barrio y el policia ya responde na un sospechoso vendida del nuevo vehiculo, que barato el precio na Barrio Boalan del ayer aga dia de Domingo, Julio 12, 2026.
El incidente, ya discubri mientras el maga oficiales del barrio ta aregla con el concierne del right-of-way, donde ya recibi sila informacion cay un menor de edad ta ofrece el un 2026 Honda Beat Motorcycle, na Zone 7, del mentionao Barrio, que el precio tali lang asegun na un mil pesos (P1,000), porcausa cay cuestionable el vendida y mayorparte el precio del vehiculo, rason para el inmediatamente actuacion del maga autoridades na lugar para checkya y verifica el report.
Despues llega na lugar el maga autoridades, ya columbra sila con el motor na posesion del menor de edad, durante el interrogacion conel bata ya revela este, cay ya manda lang conele busca buyer el dos tambien menor de edad, que reportaomente ta espera diila parte del dinero (money) na Pablo Enriquez Drive, Zone 2.
Donde ya coordina el authoridades del Barrio Boalan, con el Police Station 5 na Barrio Divisioria, y junto ya procede sila na lugar, llevando con el ya recubri motorciclo y el menor de edad, donde el maga oficiales del policia ya columbra con el dos menor de edad que ta durmi estos na urilla del camino.
Mas de investigacion ta aparece, cay con el tres (3) menor de edad, allegaomente ta usa lang el un desconocido adulto quien el ya dale instruccion canila para man disposed conel rubao motorciclo.
Ademas, el maga authoridades ya sabe tambien cay el rubao motorciclo ay debe vende na cantidad de quince mil (P15,000) de pesos, mientras con el primero menor de edad ya dale promesa comision valor de un mil (P1,000) pesos si puede le ingcuntra buyer.
Con el tres menor de edad y conel motorciclo, ya lleva na Police Station 5 para el verificacion, y na registro ta aparece cay el vehiculo ta dueña el un individual desdel Ipil, Zamboanga Sibugay.
Despues informa el recuperacion del motor con el dueño, ya expresa este voluntad recubri conel unit sin persegui plantada del caso contra conel maga menor de edad.
Siguiente na procedimiento del child protection, el tres menor de edad ya entrega na Departamento de Bienestar y Desarrollo Social (DSWD), para na propio intervencion y consejo. (Keith Luna)
Photos courtesy via: Barangay Government of Boalan – Zamboanga City