Padayon nga gipalig-on sa Municipal Government of Sindangan ang kalidad sa serbisyong panglawas ug edukasyon pinaagi sa bag-ong mga panagtambayayong ug pagpamuhunan sa pagpalambo sa kapasidad sa mga healthcare workers.
Kini human giaprubahan sa Sangguniang Bayan ang Return Service Agreement alang sa lima ka municipal nurses nga moagi sa Dialysis Training, Basic Life Support (BLS), ug Advanced Cardiovascular Life Support (ACLS) training nga pondohan sa lokal nga pangagamhanan aron mapauswag ang serbisyong medikal sa lungsod.
Gihatagan usab og awtoridad si Mayor Glona G. Labadlabad sa pagpirma sa Memorandum of Agreement uban sa Saint Joseph College of Sindangan, Inc. – College of Criminal Justice alang sa On-the-Job Training ug Community Immersion Program sa mga estudyante sa BS Criminology alang sa Academic Year 2026–2027.
Mitambong sa maong sesyon ang mga representante sa Ateneo de Zamboanga University School of Medicine, nga nagpasiugda sa padayon nga panagtambayayong tali sa lokal nga pangagamhanan ug mga institusyong akademiko sa pagpalambo sa healthcare ug edukasyon.(IKEN B. GULLEM)
Source: Municipality of Sindangan