El oficina regional del Departamento de Medio Ambiente y Recursos Naturales, o DENR, ya anuncia el designacion del Sibugay Wetland Nature Reserve (SWNR) como un Wetland of International Importance bajo el Ramsar Convention on Wetlands.
Asegun con el oficina regional del DENR del Lunes, el designacion formalmente ya anuncia durante el reciente 10th Asian Wetlands Symposium na ciudad de Quezon.
Asegun con el DENR, el reconocimiento ya marka el primer Ramsar Site na Zamboanga Peninsula y el aca-nueve na Pilipinas, segundo na Mindanao y aca-2,552 na entero mundo.
Asegun con el DENR, el SWNR amo ahora el de todo ancho reconocido Ramsar wetland na pais que tiene el anchor de 175,551.12 hectarias en nueve municipios y 64 barrios costera na provincia del Zamboanga Sibugay.
El DENR ya habla, el SWNR ta servi como un critical habitat para el migratorio y endemico fauna.
El SWNR ta suporta con 68 especies pajaros de agua incluido el vulnerable pato del Pilipinas y el amensao global especies de great knot, far eastern curlew, y garceta china.
Asegun con el DENR, ta prospera tambien dentro el reserva del SWNR el especies marinas como el criticamente en peligro turtuga Hawksbill y en peligro turtuga marina verde.
El DENR ya habla, el exitoso iniciativa ya hace posible en colaboracion del varias partes interesadas, incluido el gobierno provincial del Zamboanga Sibugay, oficiales del municipio y barangay, y mga antes y presente liderarato del oficina regional del DENR.
Instrumental tambien el suporta del mga compañero agencias como el ASEAN Center for Biodiversity, Philippines Biodiversity Conservation Foundation, Inc. y RARE Philippines. (B. Garcia)