El mga autoridad ya confisca aproximadamente 30 toneladas de taklobo que tiene el valor de P45 millones na provincia del Sulu, asegun con el policia del Lunes.
El Philippine National Police-Maritime Group (PNP-MG) ya habla con el mga taklobo ya confisa del Sabado na Barangay Taglibi, Patikul, Sulu.
Asegun con el PNP-MG, el de ila operativas hunto con el mga personajes del Ministerio de Agricultura, Pesca y Reforma Agraria, o MAFAR, ya conduci el operacion despues que ya recivi sila informacion sobre el ilegal recujida y posesion del mga taklobo.
Asegun con el policia, exitosamente ya puede confisca con el mga taklobo.
Sin embargo, ta hace sila embuscada con el dueño y financiero quien ta esta en libertad.
El policia ya habla, con el mga confiscao taklobo ya deposita na oficina del MAFAR na Sulu para el propio disposicion.
Asegun con el policia, ta continua el investigacion para determina si donde estaba el mga taklobo y si quemodo de rampante el ilegal actividad.
El confiscada ta refleja el en curso amenazo con el populacion del taklobo na Sulu archipielago.
El taklobo es una especie protejido bajo na ley del Pilipinas y el cosecha y comercio ta esta estrictamente regulados. (B. Garcia)Â