El mga autoridad ya puede ya aresta con el suspechao na un incidente de tiroteo que ya socede del Martes na Bagsakan Center del tiangge de Sta. Cruz na Barangay Sta. Maria, ciudad de Zamboanga.
El policia local ya nombra con el arestao suspechao como si Gajir Danial, 36 años el edad y residente del Sitio Margarita, Barangay San Roque, ciudad de Zamboanga.
Asegun con el policia, con Danial ya aresta na un operacion de segumiento mga alas alas 4:40 del Miercoles aga na Sitio Margarita, Barangay San Roque.
Asegun con el policia, ya precura pa era escapa si Danial, pero ya puede siempre conele coge el mga pulis despues de un lagasan.
Asegun con el policia, ya puede tamen confisca na posesion de Danial tres gramos de suspechao shabu que tiene el valor de P20,400, un .9-milimetro pistola con tres bala, P250 dinero con denominacion de dos pedaso de P100 y uno de P50.
Asegun con el policia, si Danial amo el suspechao na un incidente de tiroteo donde ya iri si Jayson Juntilla, 24, un obrero na Bagsakan Center.El policia ya habla, con Juntilla ya tira mga alas 2:10 del Martes tarde na Bagsakan Center, Barangay Sta. Maria.
Asegun con el policia, con Juntilla ya tira el suspechao mientras ta hace ele su trabajo.
Si Juntilla admitido na hospital para el curada medical. (B. Garcia)