El gobierno hay implementa mga sostenible programas para el necesidades del mga antes miembros del New People’s Army (NPA) y otro grupos de amenazos na Zamboanga del Sur.
Ese el cosa ya descuti cuando ya visita del Jueves el mga oficiales del Oficina del Asesor Presidencial para el Paz, Reconliacion, y Unidad, o OPAPRU, na cuartel del 53rd Infantry Battalion (53IB) na Guipos, Zamboanga del Sur.
El delegacion del OPAPRU ya encabesa si Oliver Binancilan. Si Teniente Coronel Rolando Vargas, Jr., el comandante del 53IB formalmente ya recivi con el delegacion del OPAPRU.
Asegun con el 53IB, el mga iniciativas hay foca na educacion, desarollo de habilidades, servicios de salud, apoyo de busca lavida, programa de amnestia y el establicimiento del organizacion de personas registradas, asegurando hay proporciona oportunidades con el mga antes individuales afectao na conflicto tene vidas productivo y obidiente de leyes.
Asegun con el 53IB, integral del esfuerzos es el operacionalizacion del Centro de Paz del Zamboanga del Sur, un dedicao facilidad establicido para servi como un centro para el programas de bienestar del mga antes rebeldes, iniciativas de resolucion de conflict, y campania de educacion de paz.
Envisionao el centro de paz como un segurao espacion donde el mga antes rebeldes y otro grupo de amenazos y de ila familia puede tene acceso na servicios de reintegracion, entreno de busca lavida, y asesoramiento, ultimamente promiviendo curada, cohesion social, y duradera paz. (B. Garcia)