El mga autoridad ya aresta seven individuales con pendiente de orden de aresto por el crimen de frustrado matansa na provincia del Maguindanao del Norte, asegun con el policia del Viernes.
El Police Regional Office-Bangsamoro Autonomous Region (PRO-BAR) nohay identifica uno por uno con el siete arestao individuales puera lang de habla’r cay mga siembradores local sila y clasificao como mga numero sinco individuales mas buscada na municipio del Dau Odin Sinsuat, Maguindanao del Norte.
Asegun con el PRO-BAR, conel siete individuales ya aresta durante el implementacion del orden de aresto del Martes na Barangay Labungan, Datu Odin Sinsuat.
Asegun con el PRO-BAR, el orden de aresto contra con el siete individuales ya dale el un corte na ciudad de Cotabato del Febrero 24, 2025.
Asegun con el PRO-BAR, con el siete individuales ya aresta el combinao grupo del policia desde’l Datu Odin Sinsuat, 1st Provincial Mobile Force Company, y 1401st Regional Mobile Force Battalion.
Con el siete aresta individuales ya pone bajo’l custodia del policia na Datu Odin Sinsuat. (B. Garcia)