Ya captura mga soldao con tres rebelde New People’s Army (NPA) na provincia del Sur Cotabato, el militar ya anuncia del Martes.
Asegun con el Western Mindanao Command (Westmincom) con el tres rebelde NPA ya captura na Sitio Kangko, Barangay Lamlahak, Lake Sebu, Sur Cotabato del Sabado tarde.
Asegun con el Westmincom con el tres capturao rebelde NPA ya conose como el siguientes: Bryan Dusa, alias Bornok, 28; Arnold Itum, 24; y si Phaizal Layol, 23 años el edad. Todo sila miembros del “Regional Operations Command” del “Far South Mindanao Region” del NPA.
Asegun con el Westmincom, ta conduci operacion militar el “5th Special Forces Battalion” cuando ya columbra y captura sila con el tres rebelde NPA.
Si Major General Steve Crespillo, el comandante del Westmincom, ya comenda con mga personajes el Joint Task Force (JTF)-Central por el de ila mga acomplisimientos.
Ya atribuji si Crespillo con el mga buen acomplisimientos na esfuerso de colaboracion del militar y mga concierne agencias y mga gente amante de la paz de Mindanao. (B. Garcia) (Photo Courtesy of Westmincom)
