Un miembro del terorista grupo Dawlah Islamiya el ya muri na tirahan contra mga soldao na provincia del Maguindanao del Sur, el militar ya anuncia del Martes.
Asegun con el Western Mindanao Command (Westmincom), el tirahan ya ocuri temprano del Sabado aga na Purok 2, Barangay Poblacion, Ampatuan, Maguindanao del Sur.
El Westmincom ya habla cay con el muerto enemigo ya conose como si Mermo Mling, un siguidores del “Dawlah Islamiya-Hassan Group”.
Asegun con el Westmincom, ta conduci “clearing operations” mga soldao cuando ya dale sila encuentro y ya man tirahan contra mga miembros del grupo de Hassan del Dawlah Islamiya na Purok 2, Barangay Poblacion, Ampatuan.
Ya alcansa el tirahan dentro de dos horas y despues ya man atras mga enemigo para na direccion de norte-iste.
Ya ase apas mga soldao con el mga miembros del Dawlah Islamiya que ya resulta na otro tirahan na Sitio Mayan, Barangay Labu-Labu II, Datu Hoffer, Maguindanao del Sur mga alas 7 del Sabado aga.
Asegun con el Westmincom ya alcansa 20 minutos el tirahan que ya resulta na muerte de Mling y el recubrida del diferentes clase de materiales de guerra na lugar del encuentro.
El mga materiales de guerra que ya recubri mga soldao ta incluwi un riple M-14, un M-79 grenade launcher, un riple Thompson con mga bala, dos improvised bomba, un radio, dos celpon, un camiseta berde, y un par chinelas.
Asegun con el Westmincom, mga soldao ta continua de ila operacion militar contra con mga Dawlah Islamiya na Maguindanao del Sur.
“Otraves, ta llama kame con el restante miembros del diferentes grupo de rebelde para uni canamon para’l pacifico resolucion del conflicto. Mas major tene paz sin perder vida,” Si Major General Steve Crespillo, el comandante del Westmincom, ya habla.
Asegun con Crespillo, el mando del militar ay esta pijo man contra con mga actividades de terorismo del restante miembros de diferente grupo del mal elementos de sociedad na centro y weste partes del Mindanao. (B. Garcia) (Photo Courtesy of Westmincom)
