Ya recubri dos armas de fuego de alta calibre mga soldao despues del un tirahan contra con mga miembros de terorista Dawlah Islamiya na provincia del Lanao del Sur, el militar ya reporta del Lunes.
Asegun con el Western Mindanao Command (Westmincom), el mga armas de fuego que ya recubri mga tropa del 3rd Special Forces Battalion ta incluwi un Rocket Propelled Grenade (RPG) launcher y un riple Garand.
Con el dos armas de fuego ya encontra el mga soldao mientras ya ase sila un operacion de limpiesa (clearing operation) na lugar onde sila ya man tirahan del Viernes na Barangay Malaginding, Tubaran, Lanao del Sur.
Asegun con el Westmincom, ya ocuri el tirahan cuando mga miembros del Dawlah Islamiya ta tira con mga soldao, quien ya ripika tamen de tiro, mientras ta conduci operacion militar el trop del 3rd Special Forces Battalion.
Un rato lang el tirahan siendo ya istindi mga miembros de Dawlah Islamiya dejando con el dos armas de fuego de alta calibre.
El dos armas de fuego bajo ahora na custodiya del 3rd Special Forces Battalion.
Asegun con Major General Steve Crespillo, el comandante del Westmincom, ay intensifica sila de ila operacion para sustene el paz na mga comunidad.
Asegun con Crespillo, ta dobla sila de ila trabajo para asegura el proteccion del mga vivientes y para elimina con el amenaso na de ila lugar de operacion. (B. Garcia, photo courtesy of Westmincom)