Ya muri el un “wanted” persona na tirahan que ya ocuri na ciudad de Lamitan, provincia de Basilan, asegun con el pulisiya del Lunes.
Asegun con el Basilan Field Unit del Criminal Investigation and Detection Group (CIDG) el tirahan ya ocuri pasada ala una del Domingo tarde na Barangay Parangbasak, ciudad de Lamitan.
El CIDG ya nombra con el muerto wanted persona como si Cantino Mayarin Hamsalin, quien tiene pendiente orden de aresto por el crimen de matansa y “multiple frustrated murder”.
Antes que ya ocuri el tirahan, el mga operativas del CIDG, militar y otro miembros del pulisiya ya anda na Barangay Parangbasak para servi orden de aresto contra con Cantino y su pariente, si Jawari Ladjain Hamsalin, quien ambos tiene pendiente orden de aresto por el crimen de matansa y multiple frustrated murder sin piansa.
Sin embargo, si Cantino ya sake su pusil y ya empesa sopla de tiro cuando ya gole ele el llegada del mga autoridad na de ila lugar.
Ya iri si Cantino cuando ya tene sinco munitos tirahan despues que ya tira tamen mga pulis para depende de ila cuerpo.Asegun con el CIDG, enseguidas ya lleva con Cantino ha hospital pero ya declara conele muerto de doctor.
Ya recubri mga pulis un calibre .45 pistola con mga bala que ya usa si Cantino para tira con el mga autoridad.
Con Jawari ya lleba para na estacion del pulisiya del ciudad de Lamitan para el propio documentacion.
El orden de aresto encontra con el dos wanted personas ya dale el tribunal del ciudad de Isabela, provincia de Basilan. (B. Garcia, photo courtesy of CIDG-Basilan Provincial Field Unit)