Un persona el ya aresta mga autoridad por violacion del “election gun ban” na provincia del Lanao del Sur, el pulisiya ya anuncia del Lunes.
Asegun con Police Colonel Robert Daculan, el director provincial del pulisiya na Lanao del Sur, con el arestao violador ya conose como si Sihawe Arope Sultan, un legal de edad.
Asegun con Daculan con Sultan ya aresta mga alas 8:40 del Sabado denoche na Barangay Batal-Punud, Marantao, Lanao del Sur.
Asegun con Daculan, ta conduci “checkpoint” mga pulis del municipio del Marantao cuando ya cuji sila con Sultan ta carga un calibre .45 pistola con cuatro bala sin el necesario documentos.
El election gun ban ta esta efectivo por causa del venedero eleccion para’l mga oficiales de barangay y para del consejo de los jovenes.
Con Sultan y el armas de fuego ya pone bajo el custodiya del pulisiya na municipio del Marantao para el propio disposicion. (B. Garcia, photo courtesy of Lanao del Sur Police Provincial Office)