Ta continua ase apas mga soldao con un grupo de rebelde New People’s Army (NPA) na un lubrigo lugar na provincia del Lanao del Sur, el militar ya habla del Domingo.
Asegun con el 55th Infantry Battalion (IB), el objeto del mga soldao amo un grupo de 15 rebelde NPA con quien ya man tirahan mga personajes del 55IB del Jueves na borde del municipio de Lumba-bayabao y Butig, Lanao del Sur.
Asegun con el 55IB, ta conduci sila operacion militar cuando ya man tirahan sila contra con el mencionao grupo del NPA que ya alcansa 28 minutos.
Mga rebelde ya istindi para na direccion de sur-iste despues que nohay sila abantia con el fuersa y tactica del mga soldao.
Asegun con el 55IB, el grupo del rebelde amo mga miembros del “Sub-Regional Committee-5” del “North Central Mindanao Regional Committee.
El mga personajes del 55IB enseguidas ya toma accion para asegura el proteccion y seguridad del borde del municipio de Lumba-bayabao y Butig.
Ya apela mga soldao con mga vivientes para esta vigilante y reporta mga suspechoso actividades na otoridad. (B. Garcia)