El Police Regional Office-Bangsamoro Autonomous Region (PRO-BAR) ya crea un Special Investigation Task Group (SITG) que ay concentra na investigacion sobre el incidente del rebentada de bomba adentro del Dimaporo gymnasium del Mindanao State University (MSU) na ciudad de Marawi.
Cuatro personas el ya muri y 50 otros el ya iri cuando ya rebenta un bomba durante un misa de Catolico adentro na Dimaporo gymnasium del MSU na ciudad de Marawi mga alas 7 del aga del Domingo.
Asegun con Police Brigadier Allan Nobleza, el director del PRO-BAR, mientras ta conduci el investigacion, ya intensifica sila con el medidas de seguridad y ya declara estado de alerto na ciudad de Marawi.
Asegun con Nobleza, el policia del Lanao del Sur ya intensifica de ila investigacion y el conducida del operacion de inteligencia y aplicacion de ley en colaboracion con el fuersa armada del Pilipinas y otro sector de seguridad para lleva na justicia con aquellos mga responsible del acto inhumano.
“Ta condena came con este sin sentido y acto de terror inhumano que ya hace con mga inocente civiles. Ay hace came todo’l esfuerso para aresta con aquellos quien responsible de este crimen,” si Nobleza ya habla.
“Ta expresa came el de amon condolencia con todo corazon con mga familia del mga victima y simpatiza con aquellos mga irido,” omento de Nobleza.
El policia na region autonomo ya ase llamda con el publico para esta vigilante y suporta con mga autoridad na investigacion del incidente para el aresto del mga echor na mas temprano tiempo y para privini semehante incidente que socede otravez. (B. Garcia, photo courtesy of PRO-BAR)