Siete cliente de un restaurant alla na ciudad de Cotabato el ya iri na un explosion de granada anoche.
Asegun con Coronel Richard Verceles, el operations chief del Area Police Command-Western Mindanao, cay el incidente ya ocuri maga alas nueve anoche, Domingo, na Park and Dine Restobar and Foodhouse na Rosario Heights two, ciudad de Cotabato.
Con el maga victima ya conose como canda Parson Guiaplos, Omar Jamalodin, Sittie Amirkan, Noranifa Uy, Mary Joy Antolan, Maricel Lenis y si Jewel Lenis.
Asegun con Verceles cay base na investigacion cay derepente ya rebenta el un granada myentras el maga victima enbuenamente ta come y ta saboria de ila comida myentras el losdemas ta saboria tamen de ila sumsuman y vivida.
Con el maga victima ya lleba para na Cotabato Regional Medical Center para el curada medical.
Asegun con Verceles cay ta continua el investigacion para conose si quein el ya gueria Granada na restaurant. (Bong Garcia, Jr.)