Mas o menos sincuenta’y cuatro gramos de suspechao shabu que tiene el valor de tresientos sesenta’y siete mil, dosientos pesos el ya confisca y nueve personas el arestao na tres separao campanya contra droga ilegal que ya resulta na bungkada del tres maga drug dens na Barangay Tetuan, este ciudad.
Asegun con Emerson Margate, el director rehyonal del Philippine Drug Enforcement Agency (PDEA), cay maga operativas ya aresta con tres personas na primer drug den maga alas cuatro y media del Sabado tarde na calle Don Toribio, Barangay Tetuan.
Asegun Con Margate cay con el tres arestao personas ya conose como canda Saudi Zamora, el alegao drug den maintainer, y canda Jhamar Zamora y Edsel Dennis Macrohon, ambos maga visita.
Maga operativas ya confisca mas o menos veinte gramos de suspechao shabu que tiene el cantidad de siento treynta’y seis mil pesos.
Asegun con Margate cay otro tres personas el ya aresta maga operativas del PDEA na segundo drug den maga alas cuatro cuarenta’y sinco del Sabado tarde alli na calle Don Toribio, Barangay Tetuan.
Canila tres ya conose como canda emil Pakirulla, el drug den maintainer y su dos visita, si Wilson Jentoso y Arnold Quartocruz.
Asegun con Margate cay na Segundo drug den ya confisca maga operativas deci-nueve gramos de suspechao shabu que tiene el valor de siento veinte nueve mil pesos.
Otro tres personas el ya aresta maga operativas del PDEA na terser drug den cuantos minutos despues alli siempre na calle Don Toribio, Tetuan, del Sabado tarde.
Si Margate ya nombra canila como canda Roseller Saavedra, el drug den maintainer, y su dos visita como canda Edgardo Bagsic y Allein Duran.
Asegun con Margate cay detenido ahora el nueve arestao suspechao myentras ay planta contra canila asunto por violasion del Comprehensive Dangerous Drugs Act of 2002. (Bong Garcia, Jr., photo courtesy of Philippine Drug Enforcement Agency IX)