Seis personas ya muri myentras siete otro ya iri na bangga-an de un ambulansya y truck del myerkoles tarde alla na national highway na Sitio Guisokan, Barangay Doña Josefa, Sindangan, Zamboanga del Norte.
Con mga muerto ya conose como si Macatual, el chufer del trak; Joseph Lopena, el chufer del ambulansya; Analisa Maribojoc, Princess Gold Ejan Sangilan, y si Julie Jay Sumonglay, todo mga pasajero del ambulansya. Uno del siete muerto ta esta desconosido.
Con el cuatro del siete irido ya conose como canda Saturnino Tagulod, Flora Mae Antoc, Sany Boy Rubayan, y Izan Luz.
Asegun con Major Shellamie Chang, portavoz del mando rehyonal nueve del pulisiya, cay ya ocuri el accidente cuando si Macatual ya perde control y ya anda na otro lao del camino despues que ya perde preno el trak ta maneja ele y ya man bangga con el ambulansya.
Durante al accidente, el ambulansya que ta maneja si Lopena con siete pasajero muntao ta viaja para na ciudad de Dipolog estaba na municipio del Liloy, Zamboanga del Norte.
Na siete pasejero del ambulancia, solante canda Tagulod and Antoc lang el ya libra.
El losdemas del mga victima, todo sila mga pasajero del trak. (Bong Garcia)