El militar ya imbia omento soldao na provincia del Basilan para ayuda guardia con el conducida de “Barangay and Sangguniang Kabataan Elections (BSKE)” en aquel provincia.
Asegun con Brigadier General Alvin Luzon, el comandante del 101st Infantry Brigade, ya llega el mga tropa del 18th Scout Ranger Company del Lunes madrogada abordo na un barco del fuersa naval na pantalan del ciudad de Lamitan.
Si Luzon ya habla el omento soldao amo para privini el posible pelyahan entre mga candidato durante el dia del BSKE na Octubre 30.
El tropa del 18th Scout Ranger Company que ta encabesa si Capitan Eljun Riel Noay, estaba pa desde provincia de Bulacan donde ya pone canila bajo el entreno.
Cuando ya llegal sila na pantalan de Lamitan, ya come hunto-hunto el mga soldao y despues ya ase ya canila hatud na de ila designao lugar.
El tropa del 18th Scout Ranger Company amo el segundo grupo de soldao que ya imbia para na Basilan para guardia con el BSKE na Octubre 30.
El primer grupo de omento soldao ya imbia na Basilan, ya llega del Octubre 15 desde provincia de Sulu. (B. Garcia, photo courtesy of 101st Infantry Brigade)