El Departamento de Medio Ambiente y Recursos Naturales o el DENR ya dale titulo del tierra con 32 mga qualificao beneficiarios na ciudad de Dapitan, Zamboanga del Norte, asegun con el DENR del Lunes.
Asegun con el DENR, con el titulo de tierra ya distribui del Jueves con mga beneficiarios en coordinacion con del govierno provincial del Zamboanga del Norte y govierno del ciudad de Dapitan.
El mga beneficiario del titulo de tierra amo mga residentes del mga barrio de Canlucani, Sto. Niño, San Vicente, Dampalan, Napuyan, Masidlakon, Owaon, Sicayab, Maria Cristina, Potol, San Pedro, Oro, San Nicoloas y Sicayab-Bucana.
El distribucion de titulo de tierra bajo el programa del como se llama “Handog Titulo” del DENR.
Asegun con Provincial Environment and Natural Resources Office Julsadjiri, el distribucion de titulo ta dale seguridad, dignidad y tranquilidad na vida del mga beneficiarios.
Si Julsadjiri ya habla cay el dalida de titulo ta sirvi como llave para del buen futuro, protejido el derecho y realisacion del aspiracion del mga beneficiarios.
El Alcalde del ciudad de Dapitan Seth Frederick Jalosjos ya expresa su gratitud con el DENR por el dalida de titulo de tierra con el mga beneifiarios quien mga residentes del mencionao ciudad. (B. Garcia, photo courtesy of DENR-Zamboanga Sibugay)