El Philippine Coast Guard (PCG) temporariamente ya suspende con el search and rescue operations (SAROPS) para el perdido Filipino tripulante del un Singaporean-flagged bulk carrier (granelero) na mar del Basilan y Sulu para puede repone de provisiones con el de ila barco.
El Coast Guard District Southwestern Mindanao (CGDSWM) ya habla del Sabado, con el SAROPS ya suspende del Deciembre 31, 2024 y inmediatamente resumi el momento hay completa el reponida del mga provisiones.
Si Aguaviva Gel Jutba, 44 años el edad, un Filipino tripulante del un granelero MV RTM ZHENG HE, ya perde mga alas 11:25 del aga del Deciembre 26, 2024 mientras el barco ya travesa na distancia de 111 millas nauticas noroeste del pantalan del ciudad de Zamboanga.
Con Jutba, quien ta usa azul oscuro reflectorizado traje, por ultima vez ya puede mira na lao isquierda cubierta principal del barco.
El barco ta viaja desde China para na Australia durante el tiempo ya perde si Jutba.
Asegun con el CGDSWM, masquin ya suspende con el SAROPS, ta continua sila bisia con el lugar por medio de continuando communicationes na Canal 16 y ya dale aviso de marineros con todo’l maga barco na region.
“Mga barcos y partes interesadas marino debe esta vigilante y reporta algun avistamientos de Jutba o relevante informacion con mga autoridades,” el CGDSWM a habla na un anuncio.
El CGDSWM que ta encabesa si Commodore Marco Antonio Gines ya habla cay ya ancha el lugar de buscada hasta na mar serca na Jolo, Sulu, donde ta puede mira mucho barco de pesca, pero nohay siempre rastro de Jutba.
Asegun con el CGDSWM, el SAROPS ta conduci ambos operaciones maritima y de earoplano. (B. Garcia)