Un retirao pulis el ya aresta mga autoridad na un operacion de atrapamiento o entrapment operation aqui na ciudad, asegun con el policia local del Miercoles.
El policia local ya nombra con el arestao persona como si Nasser Pulalon, 48 años el edad, un retirao pulis quien antes designao na Basilan Mobile Force Company.
Asegun con el policia local, con Pulalon ya aresta por el asunto de suborno mga alas 3:50 del Lunes tarde na uno del mga establisimiento de comida na calle Alcalde Cesar Climaco Avenue, Barangay Zone 4, en este ciudad.
Asegun con el policia, si Pulalon alegaomente ya suborna con el un miembro del City Drug Enforcement Unit para nomas porsigi planta caso contra con Nasher Bani alias Nas.
El policia local ya habla, con Bani ya aresta del Viernes, Abril 12, por violacion del Ley de Republic Numero 9165 o mas conocido como el “Comprehensive Dangerous Drugs Act of 2002.
Con Pulalon, quien presentamente ta esta na Sitio Asinan, Barangay Kasanyangan, en este ciudad, ya pone bajo’l custodia del Zamboanga City Police Station 11 para el propio disposicion. (B. Garcia)
