Un persona el ya aresta y valor de P340,000 droga illegal el ya confisca na un campaña contra droga na ciudad de Zamboanga, asegun con el policia del Martes.
Asegun con el Police Regional Office-9 (PRO-9), con el suspechao ya aresta na un operacion de compra busto mga alas 8:15 del Sabado denoche na Purok 3, Barangay Malagutay, en este ciudad.
El PRO-9 nohay nombra con el arestao suspechao puera lang de habla’r que un 43 años el arestao persona con quien ya cogi ta vende droga illegal el mga personajes del Regional Drug Enforcement Unit 9 (RDEU-9).
Asegun con el PRO-9, ya confisca na posesion del arestao suspechao mas o menos 50 gramos de suspechao shabu con el valor de P340,000, un bolso bandolera, 49 pedaso de P1,000 boodle money que ya pone insima un real P1,000 como markao dinero.
Asegun con el PRO-9, con el arestao suspechao ya pone bajo’l custodia del policia local en preparacion para el plantada del asunto contra conele.
Mientras tanto, si Police Brigadier General Bowenn Joey Masauding, el PRO-9 director, ya comenda con el mga personajes del RDEU-9 por el de ila acomplisimiento.
Asegun con Masauding, hay continua sila conduci operacion contra droga aqui na Zamboanga Peninsula para combate con el proliferacion de droga illegal. (B. Garcia)
