El pulisiya local en coordinacion con el Buro de Aduana ya aresta nueve personas y ya confisca ocho punto nueve milyones de pesos valor de smuggled cigarillo enantes madrogada aquina na ciudad.
Asegun con Tiniente Coronel Reynald Ariño, comandante del 2nd Zamboanga City Mobile Force Company, con el mga suspechao ya aresta y con el mga cigarillo ya confisca enantes alas cuatro veinte del aga alla na Barangay Ayala, este ciudad.
Asegun con Ariño cay ta man patrulya sila cuando ya puede sila columbra dos “junkong” ta lleba dosientos sincuenta’y sinco cahon y ochenta’y siete rims de diferente clase de smuggled cigarillo estaba na Jolo, Sulu.
Si Ariño ya nombra con el maga arestao personas como canda Alsid Dalisan, Faizal Sangkula, Abduridjan Anni y Gaspar Susulan, todo mga tripulante del primer jungkong nombrao como Ayyen.
Con el mga tripulante del otro jungkong nombrao como el Zafreen Qasla ya conose como canda Almijir Salapuddin, Benajir Mikael, Nilson Hapas, Almujeb Abdulgari, y si Abdulmalik Mikael.
Asegun con Ariño el mga arestao personas, dos jungkong y mga cigarillo ya entrega ya na custodiya del Buro de Aduana. (Bong Garcia)