El govierno local, or medio del Oficina de Salud, ya prinsipya ya del Martes clava bakuna booster con mga dose hasta deci-siete anios el edad para tene mas proteccion contra coronavirus disease 2019 (Covid-19).
Asegun con el Officina de Salud prioridad na clavada de bakuna booster aquellos mga tiene enfermedad que ta cay bajo na A3 priority group y el Rest of the Pediatric Population (ROPP) siguiendo el reglamentos del Departamento de Salud.
El bakuna booster amo el Pfizer-BioNTech que asegurao y epektibo para con mga bata dose hasta deci-siete anios el edad.
El omento bakuna parte este del extension del “primary series” para con aquellos mahina el immune system.
El omento bakuna ta dale con el mga “immunocompromised” para ase fuerte de ila immune system para el efectivo proteccion contra Covid-19.
Myentrastanto, asegun con el Oficina del Salud cay aquellos lang mga completo el bakuna puede recivi el booster shot.
Para con aquellos immunocompromised, puede canila clava booster shot veinte ocho dias despues del segundo bakuna y aquellos quien bueno el salud, debe espera sila sinco meses.
Aquellos maga bata baho con el mencionao grupo necesita manda clava booster shots mga vaccination sites, ospital, opisina del salud de ciudad y otro pa maga designao lugar.
Debe ay sigi el maga mayores y asisti con el maga bata llevando diila maga vaccination cards como prueba que ya completa ya sila de ila bakuna. (Cristine Falcasantos)