El policia na dos municipios aqui na region ya recivi nuevo vehiculo desde’l oficina del Senador Juan Edgardo Angara, asegun con el mando regional del policia del Viernes.
El recipientes del mga nuevo vehiculo ta inclui el municipio del Olutanga na provincia de Zamboanga Sibugay y el Gutalac na Zamboanga del Norte.
Con el dos nuevo vehiculo ya bendeci y el ceremonial entrego ya hace del Jueves na Campo Coronel Abendan na Barangay Mercedes, en este ciudad.
Con el dos nuevo vehiculo ya entrega si Rhom Armel Frias, el jefe de personal, por parte del Angara y ya recivi si Police Brigadier General Bowenn Joey Masauding, el director del mando regional del policia.
El dos nuevo vehiculo hay reforza y mejora el capabilidad mobil del dos estacion de policia na respondida na algun emergencia, y tambien privini y controla con el crimen, para logra un librao lugar donde esta, trabaja y man negocio.
Ademas, si Masauding ya expresa su gratitud con el Congreso del Pilipinas por medio de Angara.
Ya asegura si Masauding cay con el dos vehiculo ay usa para servi con el mga vivientes, particularmente na mga lejanos lugar na municipio del Gutalac, Zamboanga del Norte y Olutanga, Zamboanga Sibugay. (B. Garcia, photo courtesy of PRO-9)