El pulisiya ya aresta con el numero 3 “most wanted” persona na Bangsamoro Autonomous Region in Muslim Mindanao (BARMM) na provincia de Lanao del Sur.
Si Police Brigadier General Allan Nobleza, el Police Regional Office-Bangsamoro Autonomous Region (PRO-BAR) director, ya nombra con el arestao wanted persona como si Karis Tomao, legal el edad, y residente de Barangay Dilimbayan, Maguing, Lanao del Sur.
Asegun con Nobleza cay con Tomao ya aresta mga alas 1:55 del Biyernes tarde na Barangay Bangco, ciudad de Marawi, Lanao del Sur.
Asegun con Nobleza cay si Tomao tiene pendiente orden de aresto sin recomendao piansa por el asuntos criminal de matansa, “frustrated murder” y “attempted murder” que ya dale el un tribunal del ciudad de Marawi, Lanao del Sur de Hulyo 20, 2021.
Si Nobleza ya habla cay puera que numero 3 most wanted si Tomao na rehyon autonomo, ele tamen el number 2 most wanted na provincia del Lanao del Sur.
Si Nobleza ya comenda con el mga pulis por el de ila buen trabajo que ta resulta na aresto de Tomao. (B. Garcia, photo courtesy of PRO-BAR)