El Alcalde John Dalipe ya dale un reconocimiento con Señora Carmencita Sanchez por el buen trabajo que ya rindi le como el hefe del oficina de agricultura del ciudad y por su 43 años servicio na govierno local.
Si Sanchez, 65 años el edad, ya retira desde’l govierno local del Hulyo 14, este año.
“Ta rindi kita gracias con Señora Carmencita Sanchez por su 43 años servicio publico y ta felicita conele por el buen ejemplo na trabajo como el agricultor de ciudad,” el mensaje de Dalipe durante el ceremonia de la bandera (Flag ceremony) Lunes aga enfrente de City Hall.
Na mismo mensaje, ya anuncia si Dalipe el designacion de Arben Magdugo como el interino agricultor del ciudad efectivamente del Hulyo 17.
Myentrastanto, si Sanchez ya rindi gracias con Dalipe por el oportunidad ya dale conele para sirvi bajo su administracion y con el vivientes de Zamboanga, especialmente con el mga siembrador y mga fescador.
Si Sanchez ya sirvi como el hefe del Oficina de Agricultura del ciudad desde el mes de Marso año 2019. (B. Garcia, photo courtesy of City Government PIO)