Ya aresta con un persona listao como el numero 10 bien “wanted” na mga autoridad aqui na ciudad de Zamboanga, asegun con el pulisiya local del Martes.
Asegun con el Zamboanga City Police Station 6 (ZCPS6), con el arestao wanted persona ya conose como si Roseller Candido Panday, 40 años el edad.
Asegun con el ZCPS6, ya aresta con Panday na un implementacion del orden de aresto mga alas 6:35 del Lunes denoche na Paseo de Aliangan, Barangay Mampang, en este ciudad.
Asegun con el ZCPS6 cay listao como el numero 10 “most wanted” si Panday base na systema de “E-Warrant”.
El ZCPS6 ya habla cay tiene pendiente orden de aresto si Panday por el asunto de rapto sin recomendao piansa ya dale el un tribunal del ciudad del Zamboanga del Septiembre 15, 2023.
Con Panday ya pone bajo el temporario custodia del ZCPS6. (B. Garcia) (Photo Courtesy of ZCPS6)
