Un persona que ta carga armas de fuego sin licensia el ya aresta mga autoridad por violacion “Comprehensive Firearms and Ammunition Regulation Act” y el “Omnibus Election Code”, el pulisiya ta anuncia del Martes.
Si Police Colonel Alexander Lorenzo, el Zamboanga City Police Office director, ya nombra con el arestao persona como si Rolly Francisco Amil, 27 años el edad y residente del Sitio Bagong Dalan, Barangay Sangali, en este ciudad.
Asegun con Lorenzo, con Amil ya aresta mga alas 3:15 del Martes madrogada na Zone 6, Barangay Culianan, en este ciudad.
Si Lorenzo ya habla cay mga personajes del Zamboanga City Police Station 4 (ZCPS4) ta conduci “Oplan Sita” cuando ya nota sila con Amil ta para na lugar y tiene cosa ta abultia na sintura.
Si Amil ya precura istindi cuando ya atraca conele si Police Staff Sergeant Darwin Paliza pero ya puede conele cuji el otro mga personajes del ZCPS4.
Asegun con Lorenzo ya recubri na posesion de Amil un calibre .38 revolver con seis bala sin el propio documento.
Ya detene con Amil na quartel del ZCPS4 pendiente del plantada del formal asunto encontra conele. (B. Garcia) (Photo Courtesy of ZCPS4)
