Zamboanga: Pulis ya aresta 5 hente y ya confisca P3.9 milyones valor de contrabando

0
6

Sinco personas ya aresta myentras valor de P3.9 milyones de cigarillo ya confisca mga otoridad na un campanya contra contrabando aqui na ciudad de Zamboanga.

Asegun con Police Colonel Alexander Lorenzo, el Zamboanga City Police Office (ZCPO) director, cay con el aresto y confiscacion del mga contrabando ya ase mga alas 10 Biyernes denoche na vicinidad del isla de Sinunuc, aqui na Zamboanga.

Si Lorenzo ya nombra con el mga arestao personas como canda: Acob Alpha, 45 años el edad; Bensal Abedil, 37; Arman Hamsan, 57; Abdulkadil Akijil, 40; y si Khimban Maruji, 33, todo mga residentes del municipio de Kalamansig, Sultan Kudarat

Asegun con Lorenzo cay el mga personajes del 2nd Zamboanga City Mobile Force Company (2ZCMFC) ta man patrulya cuando ya columbra sila con un jungkung nombrao como el “Princess Alyesha” con sinco tripulantes.

Ya descubri mga pulis cay lleno de cahon de diferente clase de cigarillo cuando ya inspecciona sila con el jungkung y todo el sinco tripulantes ya falya presenta documento del de ila cargamento.

Asegun con Lorenzo enseguidas ya aresta con el sinco tripulantes y ya confisca con el mga cigarillo y ya pone bajo na custodiya del 2ZCMFC.

Asegun con Lorenzo cay tiene el total de 114 cahon de cigarillo con el valor de P3,990,000. El mga cigarillo estaba na Jolo, Sulu y para lleba aqui na ciuad de Zamboanga.

Con el mga arestao personas, confiscao cigarillo incluwido el jungkung esperansao entrega para na custodiya del Buro de Aduano para el propio disposicion.

El confiscacion del mga contrabando del Biyernes denoche amo el aka sinco cujida ya ase mga otoridad este mes de Hulyo aqui na ciudad del Zamboanga.

El suma total del mga contrabando ya confisca mga otoridad este mes de Hulyo ya alcansa ya mas de P23.5 milyones. (B. Garcia, photo courtesy of 2ZCMFC)

Leave a Reply