El pulisiya ya aresta con un myembro de un grupo de criminal envuelto na serye de atrocidad na provincia del Zamboanga del Sur y na mga sercanos lugar.
Si Police Lieutenant Colonel Helen Galvez, el portavoz del mando rehyonal del pulisiya, ya nombra con el arestao myembro de un grupo de criminal como si Jhamor Yusop Manlay alias Jhomar Tantong, 28 años el edad.
Asegun con Galvez cay con Manlay ya aresta por medio del implementacion de un orden de aresto mga alas 3 del Biyernes tarde na Purok 5, Sitio Sumilom, Barangay Nian, Dinas, Zamboanga del Sur.
Asegun con Galvez cay si Manlay tiene pendiente orden de aresto por el crimen de matansa sin piansa que ya dale el un jusgado na ciudad del Pagadian del Deciembre 16, 2020.
Asegun con Galvez cay si Manlay un myembro del Anwar Ansang Criminal Group, quien envuelto na mga actividades de criminalidad na municipio de Dinas y sercanos lugar.
Asegun con el pulisiya cay el Anwar Ansang Crime Group envuelto tamen nga mga actividad de kidnapping, bendida de droga ilegal, robo, extorcion, matansa con pago, y otro pa mga crimen.
Con Manlay ta aresta el combinao fuersa del pulisiya del municipio de Dinas, Regional Intelligence Division-9, y Criminal Investigation and Detection Group. (B. Garcia, photo courtesy of Police Regional Office-9)