Dos myembros del Dawlah Islamiya-Maute Group (DI-MG) el ya rindi con el tropa del Joint Task Force (JTF)-ZamPeLan na provincial del Lanao del Norte.
El Western Mindanao Command (Westmincom) ya nombra con el myembros del DI-MG quien ya rindi na municipio del Munai, Lanao del Norte como canda Abu Talha y Abu Anas.
Asegun con el Westmincom cay canda Talha y Anas ya entrega un calibre .45 pistola y .9-millimeter pistola cuando ya rindi sila dos.
Si Bangsamoro Transition Authority Commissioner Al-Haj Abdullah Macapaar y el representante del alcalde Racma Andamama del Munai ya acompania canda Talha y Anas cuando ya rindi sila na mga tropa del JTF ZamPeLan.
Con Talha y Anas ya presenta con Brigadier General Anthon Abrina, el comandante del 2nd Mechanized Infantry Brigade, y con Bruce Colao, el director provincial del Department of Interior and Local Government na Lanao del Norte.
Asegun con el Westmincom cay durante el interogacion, ya admiti canda Talha y Anas ya decidi sila rindi por causa ya sabe sila el mga buen programa del govierno para con mga antes mal elementos de sociedad y el ta keda ya poco el myembros del grupo del DI-MG.
“Ya realiza tamen sila cay de nohay sirvi el de ila ideologiya,” asegun con el Westmincom.
Si Tiñente Heneral Roy Galido, el comandante el Westmincom, ya reitera su llamada con mga restante myembros del DI-MG para rindi y ayuda sustene con el paz na provincia del Lanao del Norte y Lanao del Sur.
Si Galido ya comenda con el tropa por el esfuerso de ila que ya contribuji na acomplisimiento del Westmincom y fuersa armada del Pilipinas. (B. Garcia, photo courtesy of Westmincom)