Ya honra el Police Regional Office-Bangsamoro Autonomous Region (PRO-BAR) con el cuatro pulis (hinde tres como ya reporta de mas temprano) por el de ila valienterias durante el tirahan contra con mga terorista Dawlah Islamiya na Maguindanao del Norte.
Si Police Brigadier General Allan Nobleza, el director del PRO-BAR, con orgullo ya pone medalya na pecho del cuatro pulis cuando ya visita le canila na ospital na ciudad de Cotabato del Martes.
Aquellos quien ya recivi “Medalya ng Sugatang Magiting” amo canda Corporal Fernan Andres, Patrolman Alisona Macaandig, Patrolman Webster Badajos, y si Patrolman Abdul-Ali Lipuas todo mga personajes del Regional Mobile Force Battalion-14.
El cuatro pulis ya iri despues que ya invisti sila man tirahan cuando ya ataka canila el un grupo del terorista bajo el liderato de Comander Yusa Ganoy del faccion de Hassan del grupo Dawlah Islmiya.
El cuatro pulis ta guardia na un “detachment” na Barangay Pagatin I na municipio del Datu Salibo, Maguindanao del Norte, cuando ya ataka canila el grupo de Ganoy del Lunes.
Puera con el medalya, ya dale tamen si Nobleza ayuda financial con el cuatro pulis quien ta recupera na ospital.
Ya visita tamen si Nobleza y otro mga oficiales del pulisiya del PRO-BAR na lugar del incidente na Barangay Pagatin. (B. Garcia) (Photo Courtesy of PRO-BAR)