El Guardia Costal (Coast Guard) ya salva con 24 personas muntao na un lancha que ta man anud-anud na mar del municipio de Bongao na provincia de Tawi-Tawi.
Asegun con el Guardia Costal del Bangamoro Autonomous Region in Muslim Mindanao (PCG-BARMM) cay con aquellos ya salva de ila personajes del Lunes denoche na Luuk Tulay, Bongao, amo mga pasajeros y tripulantes del ML Ashlea.
Base na investigation, ta man anud-anud ya lang na mar el ML Ashlea despues que ya kebra el pala-pala del lancha myentras ta navega para na municipio de Languyan estaba na pantalan del Bongao.
Enseguidas ya ausilla mga personajes del “Coast Guard Sub-Station Languyan” usando un arkilao lancha nombrao como el ML Lady Rose despues que ya pidi ausillo si Hayudini Damih, el maesto patron del ML Ashlea.
Con el ML Ashlea que ta dueña Beltran Hairil ya hila para na pantalan del municipio de Languyan.
Na total de 24 personas muntao na ML Ashlea, 18 el mga pasajeros y seis el tripulantes. (B. Garcia) (Photo Courtesy of PCG-BARMM)
