El Zamboanga City Police Office (ZCPO) ya conduci un ceremonia de despedida para con el omento 167 personajes con quien hay designa na Zamboanga City Police Stations 1 hasta 11. El ceremonia de despidida ya hace del Martes na cuartel del ZCPO y ya encabesa si Police Colonel Kimberly Molitas. El designacion ya hace bajo el guia del Police Brigadier General Roel Rodolfo, el interino director del mando regional del policia, o Police Regional Office-9 (PRO-9). Asegun con el ZCPO, el ceremonia ya marka un paso significativo para garantiza cay cada estacion tiene adecuadamente personajes para mantene el seguridad y orden del publico na ciudad. Si Rodolfo ya designa omento pulis na ZCPO amediante del mga incidentes de tiroteo que ya ocuri desde’l otro mes aqui na ciudad de Zamboanga. Desde otro mes, tiene ya el total de seis casos de tiroteo el ya ocuri na ciudad y el mas reciente envuelto el matansa del un oficial de gobierno del Viernes. Si Rodolfo ya expresa concierne na subida del numero de incidentes de tiroteo na ciudad que ya habla le puede atribui na palta pulis, vehiculos, y equipajes de comunicacion. (B. Garcia)