Zamboanga: Autoridad ya aresta 2 personas mas buscada na Zamboanga Peninsula

El mga autoridad ya aresta dos personas mas buscada na separao operacion de aplicacion de ley na Zamboanga Peninsula, asegun con el policia. El mando regional del policia, o Police Regional Office-9 (PRO-9), ya identifica con el dos arestao persona mas buscada como canda Gaspar Tata Gary y si Fener Lood Cael, ambos mga legal el edad. Asegun con el policia, canda Gary y Cael clasificao como el numero cuatro y numero siete persona mas buscada na Zamboanga Peninsula, respetivamente. Asegun con el policia, con Gary ya aresta na un operacion de aplicacion de ley por medio na implementacion del orden de aresto mga alas 9:30 del Sabado denoche na Paseo de Imburnal, Barangay Sta. Catalina, ciudad de Zamboanga. Asegun con el policia, si Gary tiene pendiente orden de aresto que ya dale el un corte na ciudad de Zamboanga del Deciembre 23, 2024 por violacion del Ley Integral de Drogas Peligrosas de 2002. El policia ya habla, con Cael ya aresta na semehante operacion de aplicacion de ley mga alas 5:20 del Sabado tarde na Barangay Lumbia, ciuda de Pagadian, Zamboanga del Sur. Asegun con el policia, si Cael tiene pendiente orden de aresto sin recomendao piansa por el crimen de matansa que ya dale el un corte na ciudad de Pagadian, Zamboanga del Sur, del Febrero 28, 2024. El policia ya habla, canda Gary y Cael ya pone bajo’l custodia del Criminal Investigation and Detection Group para el propio procedimiento y disposicion. (B. Garcia)