El mando regional del policia o “Police Regional Office-9” ya anuncia el buen resulta na de ila campana contra droga ilegal aqui na Zamboanga Peninsula del primer tres meses este año.
Asegun con Police Brigadier General Bowenn Joey Masauding, el director del PRO-9, ya conduci sila total de 86 operaciones contra droga ilegal desde’l mes de Enero 1 hasta Marso 31 que ya resulta na aresto del 424 individuales.
Asegun con Masauding, ya puede confisca mga operativas total de 12,098.72 gramos de shabu y 6.9 gramos de seco ojas de marijuana que tiene el total valor de P82.2 millones como resulta del 86 operaciones.
Si Masauding ya habla, el mas notable resulta amo el confiscacion del P1.8 millones valor de shabu na Barangay Sta. Catalina, en este ciudad del Marso 13, este año, y el confiscacion del P1.4 millones cantidad de shabu del Marso 17, este año, na Barangay Sangali, en este ciudad.
Si Masauding ya alaba con el mga operativas del policia regional por el buen acomplisimiento na campaña contra droga ilegal.
Asegun con Masauding, hay continua sila inova mga estrategias na enforsada del ley para el proteccion del mga vivientes na region. (B. Garcia)