El mga operativas del “Police Regional Office-12” ya aresta con un individual listao como el numero nueve persona mas buscada na provincia de Sarangani, asegun con el Area Police Command-Western Mindanao (APC-WM).
El APC-WM ya habla cay base na report del PRO-12, con el arestao persona mas buscada ya conose como un tal “Choice”, 43 años el edad.
Asegun con el APC-WM, con Choice ya aresta durante un implementacion de orden de aresto del Miercoles na Sitio Bialong, Barangay Poblacion, Kiamba, Sarangani.
Asegun con el APC-WM, si Choice listao como el numero nueve persona mas busca na Region 12 y ta enfrenta el asunto criminal de estutorio abuso carnal.
Con Choice ya pone bajo’l custodia del policia na municipio del Kiamba para el propio disposicion.
Mientras tanto, asegun con Police Brigadier General Percival Augustus Placer, el director del PRO-12, el operacion es un testamento del intensificao campaña contra criminal mas buscada na region. (B. Garcia)