Na custodia ya ahora del mga autoridad el tres suspechao na reciente abduccion del un Americano na provincia del Zamboanga del Norte, asegun con el policia del jueves.
Asegun con Police Lieutenant Colonel Helen Galvez, el portavoz del mando regional del policia, uno del mga suspechao ya aresta durante un operacion, mientras el otro dos voluntariamente ya rendi.
El de ila mga identificacion nohay publica pendiente el conducida del mas investigacion.
El policia ya planta ya caso de secuestrada y serioso detencion ilegal base na confesion del dos suspechao quien ya rendi, hablando cay con Elliot Eastman, 26 años el edad, hay libra lang en cambio del pago de rescate.
Asegun con el policia, el mga suspechao nohay habla si cuanto el pago de rescate.
El caso contra con el mga suspechao ya somete del Martes tarde na oficina provincial del fiscalia del Zamboanga del Norte na Sindangan.
Si Police Brigadier General Bowenn Joey Masauding, el director del mando regional del policia, ya habla cay otro tres suspechao el ta esta libre y objetivo del operacion de enbuscada.
Asegun con Masauding, ta continua el operacion de enbuscada con el mga suspechao en coordinacion con el National Bureau of Investigation, National Intelligence Coordinating Agency, Western Mindanao Command, and Philippine Coast Guard.
Cuatro desconocidos armao personas ya abducta con Eastman, quien un nativo de Vermont, Estados Unidos, del Octubre 17 na su residencia na Barangay Poblacion, Sibuco, Zamboanga del Norte.
Si Eastman ya guinda na Sibuco cay ya casa le con un nativo del mancionao lugar. (B. Garcia)