El mga autoridad ya aresta durante el operacion del persiguida con el suspechao na matansa del un negocianta 11 horas despues de incidente de tiroteo que ya resulta tamen na irida del hermano del victima na ciudad del Zamboanga, asegun con el policia del Jueves.
Si Police Colonel Kimberly Molitas, el director del Zamboanga City Police Office (ZCPO), ya identifica con el arestao suspechao como si Aldester Zapanta Faustino, un residente de Barangay Bunguiao, ciudad de Zamboanga.
Asegun con Molitas, con Faustino ya aresta mga alas 11:35 del Martes denoche na Barangay Quiniput, ciudad de Zamboanga.
Si Molitas ya habla, con el identificacion del suspechao ya puede establisa por medio del rapido analisada del imagenes ya captura por medio de CCTV y coleccion del mga evidencia critical.
Asegun con Molitas, ya puede sila determina cay el suspechao tiene agravio personal contra con el mga victima.
Con el mga victima, si Elisa Eusebio, 45 años el edad y con su hermano, si Ronald, 35, ya tira mga alas 12:55 del Martes tarde na Zone 4, Barangay Maasin, ciudad del Zamboanga.
Si Elisa, quien un negociante de sorbetes, ya rebenta el resuello mientras bajo el curada medical na hospital y con su hermano, si Ronald, admitido para el tratamiento medical.
El mga victima muntao na “kulig-kulig” que ta maneja si Joseph Carpizo de camino para na barangay hall del Maasin cuando ya tira canila por muchas veces el suspechao. (B. Garcia)